„რეალობების სინთეზი“ მომაჯადოებელი ფოტოგამოფენაა, რომელშიც ტრადიციული ფირის ფოტოგრაფია ხელოვნურ ინტელექტთან წყვილდება. ესაა ხელოვანის უნიკალური სტილის ერთგვარი შერწყმა ხელოვნური ინტელექტის ალგორითმებთან. ამის შედეგად შეიქმნა მომაჯადოებელი კოლექცია, რომელშიც გაუქმებულია ზღვარი რეალურსა და არარსებულს შორის. დამთვალიერებელი კი მშვიდად მოგზაურობს სამყაროში, სადაც ადამიანის შემოქმედებითი უნარი და მანქანური ინტელექტი ერთმანეთს ერწყმის. გამოფენა ყურადღების ცენტრში აქცევს აღქმას და დამთვალიერებელს, რომელიც გაოგნებულია, უწევს გაარჩიოს, სად მთავრდება ხელოვანის ნამუშევარი და სად იწყება ხელოვნური ინტელექტის მიერ შექმნილი ელემენტები. ნამუშევრების ორმაგი ბუნება განსხვავებულ ემოციებს აღძრავს, გაოცებიდან სკეპტიციზმამდე. თანამშრომლობის ეს პროცესი განსაკუთრებულ მნიშვნელობას ანიჭებს ადამიანის ინტუიციასა და ხელოვნური ინტელექტის ალგორითმებს შორის დახვეწილ ბალანსს. „რეალობების სინთეზი“ აუდიტორიას ხელოვნებასა და ტექნოლოგიას შორის სულ უფრო მზარდ მიმართებაზე დაფიქრებისკენ უბიძგებს და ხოტბას ასხამს სილამაზეს, რომელიც ფირის ფოტოგრაფიისა და ხელოვნური ინტელექტის შერწყმის შედეგად იქმნება.

ხელოვანის თქმით, „გამოფენის იდეა გულისხმობს ჩემ მიერ შექმნილი ფირებისა და ხელოვნური ინტელექტის მიერ შექმნილი ხელოვნების ჩვენებას. იმისთვის, რომ დამთვალიერებლებს გავუმარტივო მათი გარჩევა, ვაპირებ, რომ ჩემ მიერ ფირზე გადაღებული კადრები ჩარჩოში ჩავსვა, ხოლო ხელოვნური ინტელექტის მიერ გენერირებული ნამუშევრები ჩარჩოს გარეშე დავტოვო. ამგვარად დამთვლიერებელი ადვილად განასხვავებს მათ“.

მარიამ სიჭინავა თვითნასწავლი ფოტოგრაფია, რომელიც ფირის ფოტოგრაფიის სფეროში მოღვაწეობს. ფოტოების გადაღება 2009 წელს დაიწყო, როცა პირველი ფირის ფოტოაპარატი აჩუქეს. ის, რაც უბრალო ცნობისმოყვარეობით დაიწყო, მალე მომენტების ფირზე აღბეჭდვის ცხოვრებისეულ სწრაფვაში გადაიზარდა. ის ცნობილია თავისი მხატვრული მიდგომით და გამორჩეული სტილით. სილამაზის მოხელთების ინტუიციური უნარითა და ამბის თხრობისადმი გატაცებით მარიამი დინამიკურ და ვიზუალური თვალსაზრისით გამაოგნებელ ფოტოებს ქმნის, რაც მძაფრ შთაბეჭდილებას ტოვებს დამთვალიერებელზე.

ყოველდღიურობის სილამაზით შთაგონებული ფოტოგრაფი მხატვრულ მინიშნებებს წარმავალი გამოხედვის დეტალებში, შუქ-ჩრდილის თამაშსა და ბუნების არსში პოულობს. მის გრძნობისმიერ, ქალურ და ცოცხალ სტილს მნახველი ისეთ სამყაროში გადაჰყავს, რომელიც ნოსტალგიურ ფილმს მოგვაგონებს.

მარიამ სიჭინავამ ფოტოების გადაღების დაწყებიდან სამ თვეში მოიპოვა აღიარება. ის თანამშრომლობდა ცნობილ ბრენდებთან, ხოლო მისი ნამუშევრები წარმოდგენილი იყო გახმაურებულ გამოფენებსა და პროექტებში. მისი სიუჟეტები ხშირად უკავშირდება ქალებს, ბუნებას, მთებს, სინათლეს და ყვავილებს და აღძრავს ემოციების მთელ სპექტრს. მისი ნამუშევრები სიღრმისეულ კავშირს წარმოშობს დამთვალიერებელსა და მოხელთებულ მომენტს შორის. ფოტოგრაფი ცდილობს, გააფართოოს საზღვრები და ახალი პერსპექტივები გამოიკვლიოს. თავისი ობიექტივის მეშვეობით, ის მნახველს ემოციებით აღსავსე სამყაროში ამოგზაურებს; სამყაროში, რომელშიც მოგონებები ცოცხლდება, ხოლო ამბები სამუდამოდ ინახება ზედროულ ჩარჩოებში.

მარიამის ფოტოები გამოფენილი იყო ბევრ ქვეყანაში. მისმა ნამუშევრებმა მსოფლიოს ბევრი ქვეყნის დამთვალიერებელი მოხიბლა. მისი ფოტო ნაბეჭდები, ფოტოწიგნთან ერთად, მთელ მსოფლიოში იყიდება, რაც კიდევ უფრო განამტკიცებს მის საერთაშორისო სახელს.